基隆福州點心集錦｜基隆移民美食｜豆乾包｜燒賣｜焦麵
基隆真濟點心是對廣東福建彼搭[1]傳過來的，譬如豆乾包、焦麵佮燒賣。有一寡來源有具體的考證是對福州來的，親像是鼎邊趖、紅糟系列料理，而隨著基隆有更較濟移民歷史的考證出現，傳說中和平島曾經有福州人鄉社的「福州街」，佇和平島佮福州兩爿互相有俗語來代表這兩地捷捷來往的時代，譬如和平島有俗語講「福州雞叫雞籠聽著」，抑是福州有「雞籠雞叫福州聽著」的俗語，基隆自日本時代就佮福州傳有真捷的來往，福州菜就按呢傳入去基隆成做在地的日常點心。
燒賣傳到基隆，自點心變成會使當做正頓止枵、配湯的吃法。燒賣毋若是港式點心
經過時代的轉變閣愛應對消費需求，這寡點心製造方法上嘛加減有變化。譬如講這馬已經傳到第三代的「老牌莊燒邁大王」，的燒賣毋若變了閣較大，對點心變正頓，甚至閣有會當享用著湯的燒賣；另外一个是基隆廟口出名的鼎邊趖就是福州料理代表之一，「趖（sô）」若是用台語發音就是咧形容米漿淋佇鼎邊了後兜兜仔[2]流落來的情形，等米漿焦[3]去了後就會當鉸做一塊一塊，直接囥[4]入去湯內底，因此號名鼎邊趖。毋過這个做法佇這馬的基隆較無定看。
基隆鼎邊趖已經有百年歷史，毋若是移民美食嘛是傳統美食。基隆的另外一个特色就是早頓會當選擇焦麵配扁食湯，焦麵閣以廣東麵為主，毋過廣東麵到底是對佗來的猶閣無法度追查，無論按怎「廣東麵」就佇咧基隆流傳落來，伊的形袂輸意麵抑才是白麵，毋過麵偏白，口感佮嘛無啥相仝[5]，閣佮蔥頭酥和豆芽菜相配，若是無夠食閣來一碗湯抑是幾塊仔紅糟肉來配，就是上標準的基隆早頓。
福州料理佮在地食材的結合
講著紅糟肉，基隆嘛藏袂少紅糟系列的美食，親像是紅糟肉圓、紅糟鰻等，尤其去到市場抑是各種點心擔仔，嘛定看著紅糟的影。紅糟的做法嘛是源自福州菜系統，雖然各縣市的肉圓餡猶是食法毋啥仝款，嘛攏有各自的支持者，毋過基隆的紅糟肉圓佇伊的外觀頂懸就有所差別。豬肉餡會用紅糟豉[6]，有的是外皮加入紅糟元素，有的是維持透明；粉粉紅紅的肉圓相當顯目，閣配一片一片青青脆脆的瓜仔哖和店頭特別製造的搵料[7]，氣味蓋無仝。
上尾一項就是豆乾包，定予人誤會是淡水阿給，毋過只要食過就知影兩爿的差別足大。豆乾包源自福州，伊做為移民屬性，佮在地結合了真好，成做基隆指標性的點心。製造方法是共豆乾糋[8]切開了後，共豬肉餡櫼[9]入去了後用魚漿封去來，毋過這毋是干焦封喙爾，而是實實在在共魚漿糊佇外皮，增添口感。焦、湯攏會當，對上外層的魚漿、豆腐糋閣到餡，口感豐富，鯊魚做的魚丸嘛是真經典的配合，毋過聽講早期的魚丸是鰻魚和鯊魚濫做伙做，毋過鰻魚的成本閣較懸，這馬干焦用鯊魚魚漿來做。
移民美食佇基隆釘根後的數十年，甚至是百偌年，成做巷仔內、市場內美食家才知影的點心；深入研究的演變佮移民歷史，除了予這寡點心加添時間佮空間的深度，紲嘛袂當無注意著常民美食對人來講閣較是生存止枵[10]的要素，有一寡就是應對碼頭工人的三頓，有一寡是移民佇這个所在揣著新的料理抑是結合的方式；遮看去來會當食粗飽的食物，受著時代轉變影響，抑是欲予閣較有特色，抑是欲予佇半暝閣咧做工課猶是拄下班的人食一頓飽，明仔載才有氣力通好繼續奮鬥。
台語漢字譯者：鄭慧新（北投媽媽支持團體創辦人）
華文文章：【基隆吃起來】一口吃進 百年移民美食
[1] 彼搭（hit-tah）：彼處、那裡
[2] 兜兜仔（tau-táu-á）：慢慢的
[3] 焦（ta）：乾
[4] 囥（khǹg）：放
[5] 相仝（sio-kāng）：一樣的
[6] 豉（sīnn）：醃製
[7] 搵料(ùn-liāu)：沾醬
[8] 豆乾糋（tāu-kuann-tsìnn）：油豆腐
[9] 櫼（tsìnn）：塞入
[10] 止枵（tsí-iau）：果腹
發佈留言