經歷久長的歷史，雨都基隆產生出真濟[1]獨有的傳統節慶，大部分的節慶攏遵照舊曆的時間來舉行，所以逐年舉辦的新曆時間攏會無仝[2]。
基隆人總是有真濟的好理由來慶祝，假使你佇遮的月份有拜訪基隆和東北角（金、雞、貂、石）的按算，千萬毋通共遮鬧熱的台灣文化節慶落勾去[3]！標題揤[4]落去會當看著閣較濟！
二/三月（舊曆正月）
平溪天燈節
元宵節是台灣觀光相當重要而且出名的節慶之一，逐年舊曆新年期間都會舉辦慶祝活動。平溪離基隆差不多1點鐘，像很多旅遊冊裡所寫的按呢[5]，暗時的天頂有10萬至20萬的天燈浮佇頂懸，逐葩攏載著每一个人的夢想佮希望，共紮[6]到天頂。天燈施放時間對暗時6:30開始，逐點鐘一擺一直到9:30結束。
基隆鐵枝路煙火節
七堵佇咧基隆河旁，逐年二月會舉辦煙火節。這个節慶一開始是發生在元宵節期間，佇基隆河兩岸的居民會放煙火，來進行一場袂傷感情的比賽。
其他活動包含鐵枝路攝影比賽、鐵枝路文化展覽閣有印仔收集活動（兩个印仔會當換一張悠遊卡）。遮的活動是為著紀念七堵的地標-日本時代建築，佇七堵鐵枝路文化公園內的舊七堵車站。
野柳神明淨港文化祭
這是佇元宵節期間，台灣在地最特別的節慶之一，為著欲祈求野柳地區討海人行船的平安，勇士共神明轎扛咧做伙跳入港口。神轎是四角形柴做的半開放箱仔，下跤有兩支長長的柴棍仔，會當予2-4个人扛轎。差不多佇中晝的時陣，勇士會共轎扛咧進行過火儀式。野柳保安宮保存過去的傳統，居民會提供大量的粽予神龜祈求新的一年會當國泰民安。
五月（舊曆四月）
蚵殼港迎媽祖
逐年舊曆四月，你會發現這个無講真出名毋過蓋鬧熱的活動-迎關渡二媽，根據迎媽祖的傳統，基隆的外島-社寮島（這馬的和平島）閣有仙洞巖等，攏是逐年一定會經過的繞境地點，一直到最後一站蚵殼港（基隆西定路沿線）。
此外這个慶典嘛邀請金山佮野柳的神明鬥陣參加，閣以佇基隆流行的傳統音樂-北管樂團的演奏、弄龍弄獅的表演來相伴，鬧熱進行。
六月（舊曆五月）
五日節
五日節的扒龍船比賽佇基隆八斗仔漁港非常有名，各界團體相爭欲做傷緊到終點的扒龍船冠軍。為著這工，隊伍經過規年的訓練，閣共參加比賽的龍船斟酌[7]做色[8]妝娗[9]，來維持俏麗活跳的模樣。除了扒龍船比賽，遮嘛舉辦繪圖比賽跟午時徛卵活動，閣較有唱歌比賽跟跳舞比賽等活動予在地居民做伙享樂。
七月（舊曆六月）
和平島王爺遶境
逐年舊曆六月十五號是王爺生，此時的和平島全島的居民會仝濟參與王爺生的遶境盛會。煙火、音樂、炮仔、神將閣有各種表演會對中晝開始進行，一直到下晡四點左右結束，了後還有謝神戲跟暗時的「宴王」。
外木山王爺海上遶境
逐年王爺生時，佇外木山漁村裡的重要廟宇協安宮，在地討海人會請王船佮數十台船隻佇港口的四箍圍仔踅，閣共銀紙掖[10]入海中來祭拜水底的孤魂，這項儀式代表共壞運摒掉，迎接來年的豐收。
西秦王聖誕
佇基隆旭川河西爿，北管福祿派的子弟團（軒社）叫做聚樂社，西爿的西皮派就號做得意堂。佇福祿派祭祀的戲曲神西秦王爺生時，自港邊城隍廟出發，基隆的福祿派樂團佮各組交陪軒社同齊，鼓陣、北管、幼路的四角棋、繡旗、踅市街。生日做煞[11]，接續的就是基隆傷大的慶典中元祭開始囉！
八/九月（舊曆七月）
鷄籠（基隆）中元祭
每冬舊曆七月，基隆會舉辦規系列全台灣最盛大熱鬧的中元祭。雞籠中元祭維持一個月貼貼[12]，其中傷精采的活動包含傳統藝術表演、開龕門、放水燈、普渡等等。雞籠中元祭期間強欲[13]逐工攏有無仝款的活動，毋過傷主要的儀式是佇舊曆7月12-15舉行。
7/12主普壇開燈放彩，先舉行道教科儀了後主普壇點燈替好兄弟照路，也點著規个城市。
7/14暗頭仔舉辦一場佇市區的大規模遊行，其中包括濟濟表演佮慶祝活動，替後面的放水燈作準備。遊行結束了後，佇基隆望海巷逐家共水燈點予著，而且頭向外來放水流，替水上孤魂來照路，招引來島上共享陽世人的招待。
7/15暗在主普壇會舉行公眾普渡（公普）佮跳鍾馗的科儀，除了公普以外，家家戶戶攏會當佇家己厝進行私普。各式祭品佮食物是為就確保好兄弟們能夠滿足，袂閣再轉祭拜者的厝內，隨著儀式進行，燒銀紙的部份嘛是袂當避免。佇半暝舉行跳鍾馗（除煞之神-為了保護眾生免於邪靈迫害）儀式，請好兄弟轉陰間予莫攪擾陽世人。
十月（舊曆八月）
城隍日巡與夜巡
中元祭後的舊曆八月，城隍夜巡是另一个基隆街仔的大戲。因為七月鬼門關後，專門掌管人間善惡的城隍爺猶是非常有責任感，請猶佇基隆人世間的好兄弟轉去另一个世界，就按呢城隍爺佮七爺、八爺等進行「暗訪」，暗時繞境儀式嘛為雞籠城隍文化祭其中一个大特色，一般攏佇城隍爺生日的前一兩暗舉辨（城隍足無閒）。
台語漢字譯者：鄭慧新（北投媽媽支持團體創辦人）
[1] 真濟（tsin-tsê）：很多
[2] 無仝（bô-kâng）：不一樣
[3] 落勾去（làu-kau–khì）：遺落、錯過
[4] 揤（tshī）：按
[5] 按呢（án-ne）：這樣、那樣
[6] 紮（tsah）：帶
[7] 斟酌（tsim-tsiok）：小心謹慎
[8] 做色（tsò-sik）：染色、上色
[9] 妝娗（tsng-thānn）：裝飾
[10]掖（iā）：撒
[11] 煞（suah）：結束
[12] 貼貼（tah-tah）：從頭到尾
[13] 強欲（kiōng-beh）：幾乎
發佈留言