每一个神明攏是紮著先民的願望，成做𪜶的心靈寄託。台灣民間信仰的神明掌管的職務袂輸一間企業，有負責不同區域業務的神明，譬如土地公、城隍爺，嘛有專業部門的神明，親像是幫少年男女揣對象的月老，保庇婦女順產的註生娘娘等。台灣戲曲界、北管亂彈(Lān-thâ)祭拜的神明，北管樂師佮做演藝工作的藝人祭拜的是西秦王爺抑是田都元帥！本篇介紹的西秦王爺是北管福祿派的神明代表。
基隆曾經有過好一段真興[1]北管的時間，出生佇基隆的作曲家馬水龍、演員許效舜的音樂靈感攏是來自於廟會中的北管。遮的北管兩个派系音樂的拚鬥閣較是促成這種榮景的原因之一，奉祀西秦王爺的福祿派佮奉祀田都元帥的西皮派競爭激烈，通講是台灣精神「愛拚才會贏」的開基祖，這嘛反映台灣傳統音樂的重要歷史。過往兩派在路上相拄定定會有比啥的人濟、比啥較𠢕的拚鬥，隨著時代演變佮北管音樂開始稀微[2]，雙方的弟子如今已經無以早的糾紛和競爭，干焦[3]佇中元祭的迎斗燈儀式時（舊曆七月十三），才會當佇旭川河交界處看著西皮派和福祿派較陣[4]，演出的鋩角有滿滿的玄機。
雖罔講北管文化時行的程度不像較早，毋過對王爺佮元帥的敬意猶原予𪜶佇逐年熱人做生日的時陣，共雞籠炒甲鬧熱滾滾。佇雞籠，西秦王爺生是舊曆六月二十日，而田都元帥是佇舊曆八月二十三，相連紲予雞籠街頭鬧熱沖沖滾。佇基隆旭川河以西，北管福祿派的子弟團（軒社）號做聚樂社，而東爿的西皮派號做得意堂。基隆三大廟之一的城隍廟二樓就有聚樂社一組的公廳（武英殿）佮先賢堂，逐年西秦王生時，自港邊城隍面出發，基隆的福祿派和各組交陪的軒社徛做伙，鼓陣、北管、幼路[5]的綵排、繡旗、踅基隆街市。戲曲之神西秦王爺做生日了，接續的就是基隆傷大的日子——中元祭就欲開始囉！
台語漢字譯者：鄭慧新（北投媽媽支持團體創辦人）
華文文章：【台灣文化】西秦王聖誕：北管樂戲曲之神的生日派對開起來！
[1] 興（hing）：發展、興盛。
[2] 稀微（hi-bî）：寂寥。
[3] 干焦（kan-na）：只有。
[4] 較陣（kà- tīn）：陣頭之間的較勁。
[5] 幼路（iù-lōo）：精緻。
發佈留言