佇基隆廟口夜市拄著美食家
身為台灣人，對點心擔仔會感覺著一種數念[1]，已經慣勢的故鄉味受著懷疑，一般來在地講攏會趒[2]起來維護。最近網路頂猶是路邊時常聽著人咧講：「廟口攏是予觀光客食的」這款一竹篙挵沉一船人的論調，所以想欲來遮來發一篇文來共逐家講：「真正的基隆人，仝款食基隆廟口！」基隆廟口佇大多數的基隆人心目中，是規年透天攏無歇的食食[3]天堂。佇基隆生活，會當發現廟口加上田寮河對面的的麗榮皇冠商業大樓，對基隆人來講袂輸是台北信義區、桃園銀河港廣場，是一个食食兼夜生活的所在。
佇基隆生活遮濟年閣真愛食的我，來提供我對「踅廟口的時機」佮「食食的角度」，希望後回踅廟口的時陣袂落勾去，會當予人耍了閣較暢。
基隆廟口夜市在營業時間佮傷好「踅的時機」
逐家印象中的廟口夜市，是對仁三路奠濟宮前固定的擔仔（開規工的）閣加上愛四路的擔仔組合而來。頭前彼个是二四點鐘規工攏有開，透早、中晝、暗時、食宵夜的擔仔嘛無仝款；無仝時間攏有無仝的模樣；愛四路彼搭大多數是佇 16:00～01:00 流動的販仔。
燈火初上，廟口暗噸的時間雖然精彩，毋過我個人認為體驗廟口上好的時間是拄天光、中晝佮宵夜時間（23:00以後），這个時間較罕得有觀光客，大部份是在地人，而且較袂遐爾𤲍[4]，行起來閣加一寡清閒的感覺。擔仔的種類是傳統袂花俏、料理手路猛掠、用料實在，完全體現出傳統小食迷人的所在，滿足歹喙斗的基隆人。
定佇咧人無濟的時間去廟口賴賴趖[5]，就會發現仁三路上的鉛鉼固定的 kha̋ng-páng[6]下跤定有佮「事實無符合」的擔仔寄佇遐，這个現象是廟口才有的「分班營業制」之下出現的現象。根據我佇基隆生活濟年的的生活經驗發現，佇這个奇幻的時間點，拄著在地美食家的機會上懸。
分班營業制的消夜糜推薦基隆廟口一定愛食的
1.虱目魚丸、炒大麵
舉我定食、嘛真推薦的一擔來做例，透早到中晝之間，較無法度接受傷濟重口味的食食，所以選的店口味較適合食較清的人。原本的 20 攤，店名「蟹肉、蟹足、風螺下」，有一擔所賣的虱目魚丸、炒大麵上合時。
焦鬆的油麵配脆脆的豆芽，口味清爽，滋味豐富，食較鹹的人會當淋一沿烏醋、薟薑仔醬來加添氣味。綜合丸仔湯、羹是基隆款的，湯清、牽羹[7]牽薄薄仔，幾粒卵形飽滇的丸仔，鹹中帶清甜、甜嘛拄仔好，無像台南的食物遮爾甜。
2. 光復肉羹
閣來講一擔，干焦佇日時有開店的光復肉羹。佮店名仝款，自 1945 年光復開業以來，自成一格的鹹芳型滷肉飯，閣配有微微仔火炭油芳味的煠高麗菜，樸實的氣味得著袂少美食家的意愛。
對「食食角度」看基隆廟口夜市美食
去基隆廟口一定愛買的羹，親像是基廟口鼎邊趖，大多是漳州、福州移民對故鄉帶過來的食食習慣，繼續佇基隆定根發展。
已經過往的美食家韓良露：「基隆廟口點心攤仔只要是傳承兩三代以上，攏較會當維持原本的口味」
學者曹銘宗老師：「廟口是這馬台灣上大、上集中、上傳統的點心攤仔聚落。」
文史工作者王浩一：「點心擔仔是在地物產、經濟、水準的綜合體，抑若廟口（遮講的毋是干焦基隆廟口）的五十年抑是百年點心擔仔閣較是代表」
筆者佮頭前講的美食家𪜶，雖然是無仝款的世代，無法度認定啥物才是真正的傳統、古早味，毋過經過閱讀，兜兜仔佇頭殼內底形成這个傳統點心擔仔的傳統，所代表的彼个美麗的境界。
- 傳承來自故鄉的食食文化。（譬如閩菜中的羹、福州的紅糟、福州的雞卷）
- 頂真[8]的態度。（譬如講拭甲金爍爍的白鐵桌仔、無缺角的瓷仔碗、厚工的料理方式）
- 較早開店通常有總鋪師的身分，有實在的料理基礎，才敢來做點心單仔（譬如彰化爌肉飯）
- 較早家家戶戶攏有咧煮食，交通資訊無發達，擺擔仔賣一寡淺現的食食，來的大部分是拄佇厝邊頭尾，做無好就會 hông 懷疑是毋是能力無好，來客袂倚來，自然就做袂成。
奠濟宮廟口點心擔仔，來源會當追到日本時代
自古以來，美食大多出現佇廟埕。漳州人共故鄉的信仰──開漳聖王帶來台灣，19 世紀尾，在地的士紳募款，閣加上板橋林家捐地，奠濟宮佇 1875 年起好。現今廟口的模樣，就是奠濟宮經過二次世界大戰予美軍炸彈炸過了後整理重起，後來真濟點心攤仔攏集中佇遮。
廟宇佇台灣民間的重要性真懸，毋若是在地的信仰中心，閣是吸引人潮，排擔做生理的好地理，結合人、時、地理的方便性。真濟夜市仔攏是建立佇廟宇的四箍圍仔，譬如基隆有奠濟宮、台北有慈聖宮、彰化有關帝廟。
奠濟宮廟口點心攤仔的來源會當追到日治時期尾，到今已經養育出袂少的百年老擔。提已經傳到第四代的第31號擔「天一香肉羹順」來做例，經過我調查，仁三路上的擔仔，佮這攤有親戚關係，抑是拜第一代老闆吳添福做師父的攤仔，總共就有七攤。
若是你佮我仝款真饞食[9]，吃過真濟廟口滷肉飯，就會發現逐攤的口味攏無仝，有醬甜型、鹹香型、鹹菜脯口味，逐攤攏有固定的迷眾[10]。沿著前面講的擔仔源頭，你會發現擔仔大多數是出自天一香，紲佇口味頂濟種款的表現。
這款現象照我的了解，是遮的製作者佇手藝基礎上攏真實在，堅持技術佮理念，抑是投入心血，才做出屬於家己的特色；滋味自然穩健，看起來就像是另外一種古早味的美學表現。
基隆廟口傳統點心擔仔接班，一代不如一代？
毋過，有袂少傳承第二代、第三代抑是外勞接手的店面，定定予人批評──味走去矣。店頭有時仔嘛會出來喝冤枉，講手藝抑是食材攏仝款，哪會走味？敢講是接班的人手藝輸人？抑是閣有其他的原因？
現代的製作者雖然會當複製原本的手工技術，毋過食材、調味料、資源的來源抑是運用，定定會佮過去完全無仝，凡勢予製作者較方便，嘛凡勢可能共美味的關鍵封起來矣。
食材的變動，定看著親像是換掉調味料的供應商，為著觀感的問題放棄原本吃潘[11]的黑毛豬，有當時仔會出現「減一味」的情形，這嘛說明了製作者無啥會曉變通，失去對食物滋味的基本追求。抑若現代灶跤家私嘛毋是逐項攏是好的選擇，緊毋是美食的代名詞。譬如講，知影食的人攏食的出來雙剁刀剁出來的肉餡口感，就是比絞肉機做出來的較𩚨[12]，因為絞肉機無法度共肉筋切斷，做袂出彼款自然的𩚨。
可能現代人無知覺中，有一種動力，「慢生活」就變做奢華而且真僫得到的時間，這無形中嘛改變食食的模樣。推捒台菜的黃婉玲有講過，老台菜的經典，就是用時間來換芳味。換一句話講，芳味就是藏佇咧無惜成本的時間內底。
遵照古早味，「體會」台灣菜國際形象
這馬網路時代，時常有會破壞美味的偷吃步方法佇網路頂四界傱，譬如肉燥飯的主要材料皮油，古早時的油是兜兜仔煏[13]出來的。現代定有人用糋豬油的方法，增加煸油的速度，這个方式會予肉質變老無好哺。其中嘛有袂少店來使用這款無好的習慣，甚至變做歪風的開始。佇遮毋是講技術上袂當有變通的方式，而是愛知影傳統工序的意義，因為這其中攏是經過濟代先人智慧而來的好滋味。
詳細看廟口的淺飯碗，看台南米糕、擔仔麵彼款幼路的量，就會知影點心擔仔是予人佇咧做工課時陣，來接佇正頓中間的點心，本意毋是用來當作正餐，彼幼路的程度自然是合時合地，超過食飽止枵的目的。
飲食領域中定以 Terroir 來講葡萄酒、火腿、起司⋯⋯毋管是陳年的抑是拄挽[14]當鮮的，藏佇咧表面之下的氣味結構之中，是一種無法度用語言講出來的土地力量。點心擔仔雖然俗[15]，欲提著真簡單，毋過嘛會當像彼寡品種、產地、大農場、Terroir仝款討論𪜶的氣味品牌。看起來袂輸是笑詼，毋過，若是共經濟階級彼重雺霧[16]擛[17]予散，點心擔仔嘛會當講出家己土地的故事、文化變化、人口遷徙，這本質其實就是樸實閣定著的氣味嘛。
若點心擔仔固守古早味，就算講一絲仔火炭芳都能會當引起舌尖的記持。厚工的手切蒜茸，共時令和土地成就出來的芳氣凸顯出來。頂真的工序，慢火慢煏，肉的口感當然比糋油過的肉閣較幼。台灣真濟點心擔仔若會當佇未來唌著美食家的興趣，親像是 Jabugo 火腿、揚州炒飯等佇國際印象真清楚的料理，絕對無問題。
台語漢字譯者：鄭慧新（北投媽媽支持團體創辦人）
華文文章：【基隆吃起來】基隆廟口夜市美食：在地老饕帶你這樣吃
[1] 數念（siàu-liām）：思念、眷念
[2] 趒（tiô）：跳起來
[3] 食食（tsia̍h-si̍t）：飲食、食物
[4] 𤲍（kheh）：擁擠
[5] 賴賴趖（luā-luā-sô）：四處晃
[6] kha̋ng-páng：日文かんばん(kampan)，看板、招牌的意思
[7] 牽羹（khan-kenn）：勾芡
[8] 頂真（tíng-tsin）：做事細心謹慎、毫不馬虎
[9] 饞食（sâi-tsia̍h）：嘴饞、貪吃
[10] 迷眾（bê-tsiòng）：fans
[11] 潘（phun）：餿水
[12] 𩚨（khiū）：Q彈
[13] 煏（piak）：用火炸出油
[14] 挽（bán）：採收
[15] 俗（sio̍k）：便宜
[16] 雺霧（bông-bū）：霧
[17] 擛（ia̍t）：揮、傓
發佈留言