陰光普照城市特展-佇遮變啥物鬼

拜拜的時陣，豬頭是真重要的祭品，通常是服侍大神的牲禮。若講著小鬼，in所享用的是豆乾、鴨卵這款小牲禮，較無豬頭這款大項的。
小鬼毋捌見過大豬頭，就用來比喻人毋捌看過世面，像小鬼看著豬頭這款大牲禮，就來大驚小怪，當做是不得了的代誌。

這句話就是「惡馬惡人騎」的意思。
咱攏知鍾馗生了一个面歹kê-kê，鬼仔看著會驚甲咇咇掣，是鬼中之王，會當來鎮鬼制煞。
基隆中元普渡的上尾，關龕仔門了後，會有一个「跳鍾馗」的儀式，共彼閣佇陽世遨毋願轉去陰間的鬼全全捎轉去。
鍾馗治小鬼，一物剋一物，欲來治鬼揣鍾馗就著矣啦。

閻羅王是地獄之王，做下跤手的鬼仔煞去摸伊的尻川，有影是真好膽。

這句俗語就是用「鬼仔」和「閻羅王」來比喻，講人類社會地位較低的去觸著

有權位的人，這俗語的形象是真活跳，嘛展現台語講人情世事的語言氣力。

啥物物件薄薄仔的一張，佇咱人的社會上有力？
彼就是錢、錢、錢，有力有效人人愛，連鬼嘛會收錢辦事，你去燒陰間的金紙，鬼仔嘛會予收買來挨石磨仔，做這款艱苦代啦。
有錢使鬼都會挨磨，錢有影是萬能天神啦！

這句俗語是講甘願做食飽脹死的鬼，嘛無愛活活枵死，就是咱四常聽著的「食飯皇帝大」的意思啦！

佇基隆，有影是飽鬼較濟喔！你去看廟口咧揣食的人遐濟，你閣會當去安一路、孝三路、義二路、三沙灣仔去食好料的喔！閣有和平島和八斗仔的海產啦！會當講來基隆：欲做飽鬼，毋做枵鬼啦！

明明就愛食甲欲死，喙爛㴙㴙滴，煞來假細膩，講免啦！免啦！你是毋是定定拄著這款情形，這就是「枵鬼假細膩」。

這是一句共人刮、共人詼的俗語，會當直透講囡仔愛食，閣較濟是來譬論人拄著好空的癮欲食，煞來勼手躊躇的情境，這時，就來講，莫「枵鬼假細膩」啦！

佇台灣的傳說故事內底，水鬼仔定定來出現，尤其是有人去水邊thô釣魚，煞跋落水駐死，老輩就會講去予「水鬼叫交替」或者是「水鬼掠交替」。

傳說是講，水鬼仔若欲投胎轉世，就愛掠一个活人來做替死鬼。毋閣日頭赤焱焱，佇陽世的人類社會，定定是別人做毋著代誌，煞來怪罪到你身軀頂，去hőng掠交替，實在是欲哭無目屎，人是並水鬼較惡啦！

七月時仔，咱台灣的漢人會來舉辦普渡，辦腥臊的來款待對陰間來食普的鬼仔，就親像基隆的中元，主普壇的三牲四果排甲滿滿是，會當講是台灣頭上大的普渡啦，彼就是大普。

任何代誌攏仝款，場面若大，就會分袂平，眾鬼瀳倚來，有的鬼食有，有的鬼食無強欲枵死。「大普餓死鬼」，就是來譬相膨風過頭食無的譀古代。

毋閣基隆的中元，大普袂來餓死鬼，因為攢甲實在傷豐沛，莫講鬼，連人就食甲飽ti-tu歡喜甲！

台語內底貧惰的詞閣真濟，講人懶懶啊！懶屍啊！貧惰骨啊！無攬無拈啊！閣有這句俗語就是「做鬼搶無銀紙」。

這就是欲鼓勵人做代誌較骨力咧，莫佇遐慢死慢趖，無會親像普渡咧燒銀紙，鬼仔瀳倚來搶分，你若跤手毋較猛掠咧，就搶無銀紙通開。仝款的俗語閣有「做鬼嘛搶無菜羹」、「做鬼嘛搶無蕹菜湯」，橫直，就愛較巴結咧，無你就無通食囉！